Policia italiane po heton në gjendje të lirë një infermier 41-vjeçar, nga Shqipëria. Ai akuzohet se së bashku me të dashurën kanë zbrazur llogarinë bankare e një të moshuari me koronavirus.
‘Il Messagero’ raporton se shqiptari me banim në Bergamo ka vjedhur portofolin e 66-vjeçarit, që ishte shtruar në spitalin ‘Cividate al Piano’ me simptoma të koronavirusit.
Sipas kësaj mediaje, shqiptari ka shpenzuar një shifër prej 6 mijë eurosh nga karta e tij e kreditit.
Ngjarja në fjalë është regjistruar në muajin mars. 66-vjeçari u përkeqësua në 18 mars dhe vdiq në repartin e kujdesit intensiv në 18 prill.
Anëtarët e familjes së viktimës panë lëvizjet e pazakonta në llogarinë bankare dhe u drejtuan me një padi në policinë lokale të Romano di Lombardia (Bergamo), ku u identifikuan dhe autorët.
“Një veprim i shëmtuar, në një moment tragjik, një abuzim i kryer ndaj një viktime”, tha kreu i policisë lokale, Arcangelo Di Nardo.
