Presidenti i FIFA-s, Gianni Infantino në një intervistë për të përditshmen italiane “Gazzetta dello Sport”, është shprehur se merkato e transferimeve ka nevojë për ndryshime të menjëhershme. Duke parë që merkato së fundmi ka arritur shifra marramendëse, kreu i qeverisë botërore ka vendosur të ndërhyjë dhe ti rikthejë bukurinë e dikurshme futbollit që dikur ishte sporti më popullor.
Sipas Infantinos, duhen vendosur menjëherë rregulla për transferimet dhe transparencën e pagesave të agjentëve, por edhe për imazhin e futbollit.
“E kam nisur punën për sa i përket çështjes së merkatos dhe kam prezantuar një plan me 11 propozime. Nuk më pëlqen ajo që po shoh. Në vitin 2017, shifra e transferimeve të futbollistëve arriti në 6.4 mld dollarë, ndërsa komisionet që përfituan agjentët e lojtarëve kapi shifrën e 500 milionë dollarëve. Shifra këto që do të ishte më mirë të shkonin te klubet e vogla”, tha më tej Infantino.
Infantino deklaroi se do të ishte mirë të shkurtohej periudha e merkatos verore dhe skuadrat duhet të jenë të plota në momentin që nisin kampionatet respektive.
Po kështu, ai propozoi edhe një reduktim të numrit të transferimeve në merkaton e janarit. Sipas Infantinos, ndryshimi i rregullave duhet bërë në mënyrë që futbolli të rifitojë vlerat e dikurshme, që e kanë bërë atë sportin më popullor në botë.
