Qeveria në Indi ka miratuar një urdhëresë ku kërkohet që për rastet e përdhunimit të fëmijëve, të aplikohet dënimi kapital.
Kryeministri Narendra Modi ka njoftuar se Ligjit për mbrojtjen e fëmijëve nga krimet seksuale do t’i shtohet amendamenti i dënimit me vdekje, për personat që dhunojnë seksualisht fëmijët nën moshën 12-vjeçare.
Sipas ligjit të deritashëm në Indi, dënimi maksimal për përdhunimin e fëmijëve ishte dënimi me burg të përjetshëm, transmeton DPA.
India është përballur me raste të shumta të dhunimit seksual të fëmijëve. Vetëm gjatë kësaj jave, janë raportuar katër raste të përdhunimit të vajzave minorene, shkruan rel.
Kritikat e shumta dhe protestuesit që kanë kërkuar nga Qeveria masa më të rrepta ndaj këtyre krimeve, thuhet se kanë sjell vendimin për aplikimin e dënimit kapital.
