Një raport i posaçëm për ekonomitë evropiane në zhvillim, mes të cilave është edhe Shqipëria të publikuar nga BMI research tregohet se Shqipëria është ndër vendet më të rrezikuara në rajon kur flitet për indeksin e riskut.
Ndryshe nga raportet e mëparshme, agjencia në raportin e fundit përfshin edhe një indeks risku për vendet e Evropës Jug-lindore, ku i jep secilit shtet një pikëzim nga 0 në 100, si në terma afat-shkurtër ashtu edhe në terma afat-gjatë, në dy drejtime; politikë dhe ekonomi.
Shqipëria duket më e rrezikuar në afatshkurtër, ndërkohë që në afatgjatë situata duket më e sigurt. Edhe mes ekonomisë dhe politikës, ekonomia duket se është faktori më kërcënues.
Në krahasim me vendet e tjera të rajonit ndërkohë, Shqipëria, me një pikëzim të përgjithshëm në 53.5 pikë, lë pas në renditje vetëm Kosovën dhe Bosnje Hercegovinën, transmeton scan.
Sa i përket politikës, dhe rrezikut që buron nga ajo, Shqipëria është e treta në Europë, duke lënë pas thuajse të gjithë fqinjët me radhë. Indeksi i riskut që i referohet ekonomisë ndërkohë, në terma afat-shkurtër, e rendit vendin tonë, të parafundit në rajon. Në thuajse të gjithë indikatorët, Shqipëria rezulton nën mesataren e rajonit. Dhe në të gjitha rastet, nën mesataren globale.
