Kryeministri Edi Rama e cilësoi fushatën elektorale si më paqësoren të viteve të pluralizmit politik. E vetmja gjë e çuditshme sipas tij, është përfshirja e presidentit të zgjedhur Ilir Meta në fushatën elektorale.
Duke folur për mediat pas miratimit nga Kuvendi të 27 kandidatëve që do të bëjnë rivlerësimin e gjyqtarëve dhe prokurorëve përmes Vettingut, Rama theksoi se marrëveshja midis tij dhe kryedemokratit Basha është në interes të qytetarëve shqiptarë dhe jo për të ndarë pushtet mes njëri-tjetrit.
“Kjo është fushata elektorale më e qetë, nga sa fushtata mbaj mend unë. E qetë nga ana e gjuhës politike, nga ndotja e mjedisit, pa postera. Por, ajo që e ka bërë të çuditshme është futja e presidentit të zgjedhur në fushatë. Por, ne jemi me njerëzit dhe me mendjet e tyre. Nëse do të donim të kishim më shumë pushtet, Luli do të ishte në çadër, Jozefina po nuk do të ishte në listë. Nga marrëveshja fituan shqiptarët. Ne u themi që të na votëbesojnë shqiptarët. Po të mos ishim të interesuar për Vettingun dhe procesin elektoral, dhe për drejtësinë do të kishim më shumë mandate”, u shpreh Rama.
