Një incident ka ndodhur brenda një avioni të linjës Prishtinë-Basel, ku janë lënduar 10 persona si pasojë e turbulencave. Brenda avionit ndodheshin 121 pasagjerë, ndërsa incidenti ka ndodhur 20 minuta para se të bëhej ulja.
Zëdhënësja nga EuroAirport në Zvicër ka thënë se ekipet e emergjencave kanë dalë menjëherë në aeroport pasi aeroplani ishte ulur dhe i kanë trajtuar të lënduarit.
Në videon e publikuar nga mediat në Kosovë duken pamjet tmerruese, dhe pasagjerët të cilët i luten Zotit që të shpëtojnë.
Mësohet se disa prej pasagjerëve u gjakosën në kokë dhe se rripat e sigurimit u këputën nga turbulencat e mëdha.
Po ashtu, ata ankohen se shkak për këtë incident ishte vjetërsia e aeroplanit dhe se të tilla raste të turbulencave ka pasur edhe herë të tjera.
