Ekspertët e OBSH-së bëjnë me dije se deri më tani nuk janë gjetur shenja antitrupash në gjak, që të provojnë se të shëruarit nga korovirusi kanë fituar imunitet ndaj tij.
Drejtori ekzekutiv i OBSH-së, Mike Ryan tha se ajo që cilësohet si “imuniteti i tufës” nuk është arritur ende.
“Pritej që imuniteti i tufës të ndodhte dhe shumica e personave të zhvillonin antitrupa. Por deri më tani provat po e kundërshtojnë këtë teori. Nuk po e zgjidhim problemin ashtu siç pritej”, tha ai.
Ditët e fundit është rritur numri i pacientëve të shëruar nga COVID-19, që janë infektuar sërish. Kjo gjë ka ngritur edhe shqetësimin e ekspertëve, lidhur me funksionimin e antitrupave në organizëm.
Deri më tani shpresohej se personat e shëruar nga COVID-19 do të fitonin imunitet, por së fundmi në shumë vende çdo ditë e më shumë raportohen infektime të përsëritura, duke ngritur pikëpyetje lidhur me mënyrën sesi vepron koronavirusi.
Më shumë se 2,3 milionë njerëz nga e gjithë bota janë prekur nga virusi vdekjeprurës, ndërsa mbi 161 mijë persona kanë humbur jetën.
