Ilir Latifi, luftëtari shqiptarë i MMA apo arteve marciale mikse i cili renditet i katërti në kategorinë Light Heavyweight apo Gati e rënd ( 84 deri në 93 kg), pak ditë më parë ka vizituar Shqipërinë. Latifi ka bërë një promovim të sportit që ai ushtron edhe pse përfaqëson Suedinë, në sheshin Nënë Tereza dhe është shprehur se ky është një sport që ne shqiptarët mund të arrijmë shumë lart, duke parë karakterin dhe gjaknxehtësinë.
Pasi mbaroi promovimin në Tiranë, Ilir Latifi ka udhëtuar drejt Kosovës, ku ka dhënë një intervistë të gjatë për televizionin Klan Kosova, në rubrikën e sportit. Ai në intervistën e tij zbuloi fillet e karrierës dhe arritjen e tij në majat e këtij sporti, intervistë të cilën ju ftojmë ta ndiqni.
Në rrugëtimin për titull Iliri mund të përballet me shokun e tij të ngushtë, por të dytë kanë bërë një premtim
Shoku i tij i ngushtë është Alexander Gustafsson. Dyshja janë stërvitur së bashku në 15 vitet e fundit dhe një përballje mes tyre do ishte ngjarja e vitit në Suedi. Por, kjo nuk do të ndodhë.
Pasi, si Latifi ashtu edhe Gustafsson, ia kanë dhënë fjalën njëri-tjetrit që kurrë nuk do të luftojnë në mes veti. Do të ndërrojnë edhe kategorinë nëse është nevoja, njëri do të qëndrojë në peshat e lehta, tjetri do të ngjitet në ato të rënda. Kjo vetëm që ata të mos luftojnë mes vete.
Një fakt interesant që lidhet me emrin e Gustafsson është debutimi i Ilirit në UFC më 6 prill 2013.
Gustafsson u lëndua dhe Ilirit iu kërkua të luftojë ndaj Gegard Mousasi, e gjitha kjo vetëm katër ditë para fillimit të luftës. Por, që bota e UFC-së të njihej me shqiptarin, ai duhej të bënte një sakrificë të madhe. Brenda katër ditëve kishte rënën në peshë në mënyrë drastike, vetëm që të pranohej në kategorinë e peshave të lehta (kategorinë e mesme). Në fund Iliri kishte humbur, por ky ishte një rast që nuk duhej lëshuar.
Humbja e 12-të kilogramëve në katër ditë nuk ka ndodhur asnjëherë deri më tani në historinë e UFC-së dhe sot e kësaj dite flitet ende për këtë gjë.
Ndeshja e ardhshme
Me 22 korrik ndaj Glover Teixeiras. 38-vjeçari cilësohet si një kundërshtar i vështirë dhe arsyeja që do të ndeshet me atë është se braziliani renditet i treti në kategorinë e Ilirit (shqiptari kujtojmë është i katërti). Në vend të parë është kampioni Daniel Cormier, i dyti miku i tij, Alexander Gustafsson.
Në rast të fitores ndaj Teixeiras, Latifit do t’i hapet rruga për titull dhe dëshira e Ilirit është që meçi të ndodhë gjatë vitit 2018, pasi po kalon në formën më të mirë fizike.
Jeta e tij jashtë UFC-së dhe Tetëkëndëshit
Iliri është një tip i qetë, shumë i sjellshëm më të gjithë. Kjo është edhe arsyeja që ai nuk preferon të bëjë skena, sharje dhe debat të ashpër me kundërshtarët. Pasioni i tij është natyra dhe kafshët, ndërsa në të ardhmen kur do të pensionohet nga UFC, do të bëjë një spektakël rreth tyre. Aktualisht nuk është në një lidhje dashurie, pasi dëshiron t’i përkushtohet 100 për qind UFC-së.
