Shqiptari nga Kosova, Iliaz Bazna, ka qenë ndër spiunët më të famshëm gjatë Luftës së Dytë Botërore, i njohur me pseudonimin e tij “Ciceroni”. I lindur në Prishtinë në vitin 1904, Bazna u zhvendos shpejt me familjen në Stamboll. Ndoqi fillimisht Akademinë Ushtarake, prej nga ku do të përjashtohej shpejt, dhe do të niste jetën e hajdutit ordiner në Stambollin e pushtuar nga aleatët, duke bërë edhe disa vite burg.
Më pas u punësua në një fabrikë ku prodhoheshin çelësa për kasafortat, duke u bërë mjeshtër në këtë profesion. Pasi punoi për ambasadorin jugosllav, ai arrin të punësohet nga ambasadori britanik në Ankara, Knaçbull-Hugesen.
Shqiptari u bë njeriu më i privilegjuar dhe më i besuar i tij, duke pasur akses në dokumente shumë të rëndësishme sekrete. Ai prodhoi kopje të tyre, dhe ia ofroi ato gjermanëve për 20 mijë paund. Pas shumë hezitimesh dhe dyshimesh gjermanët pranuan. Nga ai moment Bazna, furnizoi gjermanët me shumë materiale të tjera sekrete, duke përfshirë edhe planet e Konferencës së Kazablankës, dhe asaj të Teheranit midis Ruzveltit, Çërçillit dhe Stalinit. Nga “Ciceroni”, nazistët kuptuan për herë të parë planet e aleatëve për pushtimin e Evropës.
Një anti-nazist në rradhët e Rajhut e denoncoi Baznën tek aleatet, dhe kështu rrjedhja e informacionit u ndal në pranverën e vitit 1944, pak përpara zbarkimit të aleatëve në Normandi. Bazna u arrestua në Ankara, por nuk pranoi asnjë nga akuzat. Ai arriti të arratisej, duke shkuar në Amerikën e Jugut. Aty nisi të bënte një jetë lukzose me paratë që kishte fituar nga spiunazhi, deri kur autoritetet vendase zbuluan se shumica e stërlinave britanike ishin false. Bazna u arrestua dhe u burgos sërish. Më vonë lirohet dhe rikthehet në Evropë. Vdes në varfëri të plotë në Turqi në vitin 1971.
