Të rrëfejë historinë e artistëve, atë çka shumë prej shikuesve të ekranit apo ndjekësve të teatrit nuk e njohin. Është ky projekti i ndërmarr prej vitesh tashmë, i profesorit të njohur Përparim Kabo. Intervista me emrat që kanë krijuar artin shqiptar. Për të sjellë një studim fondamental mbi antropologjinë e artit.
“Ne shohim skenën kur ai luan një rol, ose ekranin e madh kur ai shfaqet në film, por pas kësaj ka një njeri. Edhe këtë pjesën tjetër që është filmi apo teatri real i tyre, pak e njohin. Në këtë kuptim unë vazhdimisht ngul këmbë, edhe punoj dita-ditës që këto të gjejnë pasqyrim në faqet e studimeve që unë bëj. Të cilat do t’i shërbejnë të sotmes, kryesisht edhe të ardhmes.”
Kabo bën thirrje për një kujdes më të veçantë për artistët nga politika. Pasi, është e turpshme të shohësh një artist që i ka dhënë kaq shumë shtetit të vetë dhe në fund të mbetet në gjendje të keqe.
“Artistët nuk kanë nevojë për politikën, arti është një medium i tillë që e sfidon politikën në të gjitha kohërat. Artistët mbeten, sepse arti prek ndjenjat e çdo njeriu, ndërsa politika është më e ftohtë, më e pavërtetë, ndonjëherë edhe hipokrite. Edhe nëse nuk tregon respekt honorifik ndaj artistëve, e humbur del sërish politika.
Zgjidhja nuk janë vetëm pensionet, sepse pensioni në vetvete është një pagesë që bazohet te kontributi i sigurimeve. Në fakt artistët në të gjithë botën pasurohen me shitjen e veprës. Pra, këtu duhet të rregullohet e drejta e autorit.
Nuk është pasuria ajo që bën gjithçka, por varfëria i prish dinjitetin njeriut. Do të ishte e pafalshme të shihnim artistë në të gjithë Shqipërinë, që i kanë dhënë kaq shumë artit, e në fund të jetës ata të kenë pasuri vetëm varfërinë e tyre ekonomike.
Por, përsëri ata janë dinjitoz edhe në këtë gjendje ekonomike, nuk lëshohen. E në këtë kuptim, të vrasin dy herë. Edhe me gjendjen, por edhe me atë mirësinë e tyre për të mos u ankuar. Shumë gjëra mund të bëhen më mirë për ta, në lidhje me kujdesin shëndetësor, vendin ku banojnë etj. Por, që të bëhen më mirë kërkojnë dashuri. Jo vetëm një herë në vit, kur ke ditëlindjen, por çdo ditë.” TIRANA TODAY
