Inspektorë të Inspektoratit të Mbrojtjes së Territorit që në orët e para të mëngjesit kanë shkuar në ambientet e resortit “Prestige Resort” në plazhin e Golemit, në pronësi të “Hysenbelliu Group”. Mësohet se IKMT do të kryejë prishjen e pishinës të vendosur në resort.
Ndërhyrja është bërë në një kohë kur resorti është i frekuentuar nga turistë vendas dhe të huaj. Aksioni ka nisur pa paralajmëruar më parë, ndërsa ende nuk ka arsyetime nga institucionet se ku qëndron paligjshmëria.
Fadromat e IKMT-së kanë nisur shembjen e murin të jashtëm para pishinës. Ky objekt është dhënë me leje të kryeministrit Edi Rama.
Deputetja e Partisë së Lirisë, Erisa Xhixho, e ka cilësuar të paligjshëm dhe hakmarrje të pastër politike.
“Biznese që mbajnë familje të tëra me paga dhe punësim, vjen dhe i shantazhon dhe dëmton një biznes ku fare mirë me gjuhën e dialogut mund të gjejë një mirëkuptim”, tha Erisa Xhixho, e cila është e pranishme në aksionin e IKMT në “Prestige Resort”.
Gjithashtu edhe nga ana e tij deputeti Petrit Vasili, tha se kjo është një hakmarrje e qeverisë pas denoncimeve të shumta.
“Është një sulm, hakmarrje duke shkelur çdo ligj dhe rregull. Gjithçka ka qenë me dokumentacin dhe i rregullt. Është vetëm hakmarrje dhe asgjë më shumë. Mafiozi që drejton Shqipërinë, hakmerret. Kjo është një pamje që i japim turistëve”, tha Vasili për “News24”.
