Kryetari i Partisë për Drejtësi Integrim dhe Unitet, Shpëtim Idrizi, i ftuar në “Natë me Xhaxhiun”, sërish ka shënjestruar kryeministrin Rama. Dy javë më parë, Idrizi vendosi shkëputjen nga “tepsia” e Ramës, teksa i doli në krah opozitës.
Kryetari i PDIU, në morinë e akuzave, ka thënë se Rama ka blerë deputetët që ishin nën siglën e partisë së tij, madje e ka akuzuar dhe se ka vjedhur mandatin e saj për Tiranën.
“Rama i bleu deputetët që ishin në siglën e PDIU, dhe jo vetëm kaq, por na u vodh mandati i Tiranës”, ka thënë Shpëtim Idrizi.
Në një intervistë të dhënë më herët për “Top Show”, Idrizi u shpreh se “Çështja e Çamërisë nuk ishte në program në mandatin e dytë, dhe që nga ai moment, ne ishim në opozitë. Në program kishte vetëm timon e tepsi”.
“Nuk ka burrë nëne që ta përdorë njeri Çështjen Çame si tepsi. Si mundet që Ditmir Bushati, nuk na pret për të diskutuar Çështjen Çame? Me një shtet si Greqia që nuk njeh as Çamërinë dhe as Kosovën, nuk mund të bëhet marrëveshje e partneritet strategjik”, shtoi Idrizi.
