Pas debateve të shumta, KQZ ka marrë vendimin që të rinumërohen kutitë e votimit, ku PDIU pretendon të marrë mandatin e Shpëtim Idrizit.
Është vendosur që nesër në orën 10:00 të hapen edhe kutitë e votimit që pretendon Partia Socialiste.
Në total do të jenë 72 kuti, 49 të kërkuara nga PDIU dhe 23 të kërkuara nga PS që do të hapen nesër në ambientet e KQZ-së.
Kreu i PDIU, Shpëtim Idrizi pretendon se mungojnë të paktën 66 vota në disa kuti votimi në qarkun e Tiranës.
Ndërsa PDIU-ja kërkon një mandat për Shpëtim Idrizin, edhe PS-ja kërkon rinumërim në disa qendra votimi, pasi sipas tyre ka mospërputhje mes pamjeve filmike që disponojnë dhe shifrave në tabelat e rezultateve.
“Unë ju sfidoj të gjithëve, që nëse hapen kutitë e Tiranës dhe nëse arrini të gjeni një që përputhet me procesverbalet. Votat e pavlefshme janë ndarë mes subjekteve zgjedhore. Kemi mbajtur shënim edhe votat e partive të tjera. Në 90% që ne kontestojmë, kemi patur numërues vetëm në 10% të tyre. Në ato qëndra ku PS kërkon rinumërim, ne kemi patur numërues vetëm në dy prej tyre. Rastet tregojnë se në procesin e numërimit është tjetërsuar vullneti i shqiptarëve”, u shpreh Idrizi.
VENDIMET SOT:
Komisioni Qendror i Zgjedhjeve miratoi projektvendimet për shpërndarjen e mandateve, në 10 qarqe të vendit, si qarku Vlorë, Shkodër, Lezhë, Kukës, Korçë, Gjirokastër, Fier, Elbasan, Durrës dhe Dibër.
Për shpërndarjen e mandateve, Qarku Vlorë, KQZ vendosi të shpërndajë mandatet për partitë politike në zonën zgjedhore qarku Vlorë; Partia Socialiste 8 mandate, Partia Demokratike 3 mandate dhe Lëvizja socialiste për Integrim 1 mandat.
Për qarkun e Shkodrës, Partia Demokratike 5 mandate, Partia Socialiste 4 mandate,Partia Social Demokrate e Shqipërisë 1 mandat dhe Lëvizja Socialiste për Integrim 1 mandat.
Për qarkun e Lezhës Partia Socialiste 3 mandate, Partia Demokratike 3 mandate dhe Lëvizja socialiste për Integrim 1 mandat.
Për qarkun e Kukësit, Partia Demokratike 2 mandate dhe Partia Socialiste 1 mandat.
Për qarkun e Korçës, Partia Socialiste 6 mandate, Partia Demokratike 4 mandate dhe Lëvizja socialiste për Integrim 1 mandat.
Për qarkun e Gjirokastrës Partia Socialiste 3 mandate, Partia Demokratike 1 mandat dhe Lëvizja socialiste për Integrim 1 mandat.
Për qarkun e Fierit Partia Socialiste 10 mandate, Partia Demokratike 4 mandate dhe Lëvizja socialiste për Integrim 2 mandate.
Për qarkun e Elbasanit Partia Socialiste 7 mandate, Partia Demokratike 3 mandate, Partia Drejtësi, Integrim dhe Unitet 2 mandate dhe Lëvizja socialiste për Integrim 2 mandate.
Për qarkun e Durrësit Partia Socialiste 8 mandate, Partia Demokratike 4 mandate dhe Lëvizja socialiste për Integrim 2 mandate. Për qarkun e Dibrës Partia Socialiste 2 mandate, Partia Demokratike 2 mandate, Partia Drejtësi, Integrim dhe Unitet 1 mandat dhe Lëvizja socialiste për Integrim 1 mandat.
Gjithashtu, KQZ shqyrtoi dhe miratoi projektvendimin, “Për verifikimin e deklarimeve në formularin e vetëdeklarimit të kandidatëve nga listat shumemërore për Këshillat Bashkiak, në zbatim të ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike.
KQZ vendosi njoftimin e këshillave bashkiakë për vazhdimin e procedurave për dhënien e mandatit kandidatëve të listave shumemërore, për plotësimin e vendeve vakantë në këshillat bashkiak në qarkun Tiranë, Bashkia Kavajë, Ermal Durim Çaça dhe Qarku Elbasan, Bashkia Gramsh, Anxhela Myrtezan Kokomeci.
