Duket se mediat greke kanë patur të drejtë, një shqiptar ka qenë pjesë e aktit të tmerrshëm të vrasjes së 20-vjeçares, nënë e një fëmije 11 muajsh. Hetimet kanë marrë një rrjedhë tjetër, pas të gjithë të dhënave që dha bashkëshorti i së ndjerës, duke rrëfyer në detaje se çfarë kishte parë para se të ndodhte masakra. Tre ditë më parë, bashkëshorti i viktimës tha se kishte parë fytyrën e vrasësit. Dhe policia është hedhur menjëherë në veprim, duke zbuluar autorin e krimit makabër. 20-vjeçarja Caroline Crouch, u vra në mënyrë brutale në Athinë, pas një grabitje në shtëpinë e saj. Bashkëshorti i saj, Babis Anagnostopoulos ka dëshmuar më herët në polici se vrasësi, është një 30-vjeçar ezmer, rreth 1.7 metra i gjatë dhe i shëndetshëm. Ai nuk ka folur me bashkëpunëtorët gjatë gjithë grabitjes, përveç momentit kur është larguar. Babis ka thënë se ai ka folur disa fjalë në një gjuhë që nuk e kuptonte dot.
Pak ditë nga ngjarja e rëndë, media greke ‘Espresso’ ka përcjellë disa detaje të reja, duke bërë që ngjarja të marr një tjetër kthesë.
‘Espresso’, në shkrimin e publikuar sot citon se policia ka rënë në gjurmët e personit që vrau të renë. Personi që i mori jetën 20-vjeçares Caroline Crouch është një kriminel i njohur shqiptar, i dënuar për “vrasje në tentativë”, “formimin e një organizate kriminale”, “grabitje” dhe një mori krimesh të tjera, dhe i cili ka dalë kohët e fundit nga burgu.
“Shqiptari në barbarinë e shtëpisë – Policia e njeh “njeriun e shkurtër” që vrau Caroline-n. I pamëshirshmi që vrau Caroline-n, duket se është zbuluar prej disa orësh nga policia që po heton çështjen e tmerrshme! Pyetja në lidhje me identitetin e “të shkurtrit “, i cili dyshohet se torturoi dhe vrau Caroline-n 20-vjeçare para foshnjës së saj 11 muajshe, duket se ka gjetur përgjigje prej disa orësh nga policia që po heton çështjen e rëndë!”.
Sipas informacioneve ekskluzive nga “Espresso”, ai është një kriminel i njohur shqiptar, i cili ishte dënuar për “vrasje në tentativë”, “formimin e një organizate kriminale”, “grabitje” dhe një mori krimesh të tjera, dhe i cili ka dalë kohët e fundit nga burgu. “Në fakt, policia e kërkoi atë në adresën që ai kishte deklaruar si vendbanimin e tij, në Agia Paraskevi, por pa rezultat. Autoritetet e policisë u vunë pas shqiptarit duke përdorur të dhëna të gjetura në shtëpitë e rrugës Panagouli në Glyka Nera, si dhe duke u bazuar gjithashtu në përshkrimin e pilotit 32-vjeçar. Ky i fundit kishte raportuar se “një i shkurtër” nga grupi i kriminelëve që hynë në shtëpinë e tij, ka një gjatësi prej rreth 1.70 m., është i shëndoshë dhe ezmer”, shkruan media greke.
Piloti 32-vjeçar, bashkëshorti i së ndjerës, do të thirret për të dëgjuar gjuhë dhe dialekte të huaja, si dhe për të parë fotot e kriminelëve, të cilët janë vendosur në “listën e kuqe” të Sigurimit, listë që përfshin persona të dyshuar në rastin e grabitjes me pasojë vrasjen, për të përcaktuar më pas nëse karakteristikat e disave prej tyre korrespondojnë me ato të hajdutëve që hynë me dhunë në shtëpinë e tij.
Siç dëshmoi 32-vjeçari, në mëngjesin fatal, grabitësit nuk u munduan shumë t’ia mbyllnin sytë fort, për pasojë ata lanë një të çarë të vogël, nga e cila ai mund të shihte. Në dëshminë e tij të parë, piloti përshkroi shkurtimisht momentet e këqija që përjetoi, duke dhënë informacione rreth autorëve.
“Të dy ishin relativisht të gjatë. Unë do të thoja diku tek 1.80 metra, të dobët, por në formë. I treti ishte më i shkurtër, pak më shumë se 1.70 metra dhe më i mbushur. Ai dukej të ishte udhëheqësi. Dy më të gjatët kishin veshur kapuçë të zinj…”.
Kaq ka mjaftuar në dëshminë e tij, që hetimet të merrnin një tjetër drejtim, e për të shkuar drejt zbardhjes së plotë. 20-vjeçarja u torturua dhe më pas u vra në mënyrë brutale përpara fëmijës 11 muajshe dhe bashkëshortit të saj. Caroline ishte britanike dhe jetonte në një lagje të Athinës me bashkëshortin e saj. Sipas asaj që shkruajnë mediat, fillimisht e reja u torturua ndërsa më pas u mbyt derisa vdiq.
Më herët është raportuar për arrestimin e një 35-vjeçari gjeorgjian. Policia greke ka premtuar 300 mijë euro për këdo që jep informacione, që çojnë në zbardhjen e autorëve të ngjarjes së bujshme, e cila tronditi Greqinë për nga brutaliteti i vrasjes. Autorët ikën me 10 mijë euro nga shtëpia, ndërsa mësohet se ata kishin informacion se në banesë ndodheshin 100 000 euro, pasi çifti kishte shitur një tokë pak ditë më parë. /Tirana Today
