Policia e Elbasanit, ka identifikuar dhe shpallur në kërkim ndërkombëtar një nga autorët e vrasjes së trefishtë të ndodhur në vitin 2018, në zonën e Metalurgjikut në Elbasan, ku mbetën të vrarë Endrit Alibej, Arben Dylgjeri dhe shtetasi turk Erdal Duranay.
Bëhet fjalë për 35-vjeçarin, Mikael Qosja, i cili është i dyshuar për veprat penale “Vrasje në rrethana të tjera cilësuese” e kryer në bashkëpunim dhe “Armëmbajtja pa leje
“Strukturat hetimore të Drejtorisë Vendore të Policisë Elbasan, nën drejtimin e Prokurorisë pranë Gjykatës së Shkallës së Parë Elbasan, pas një pune të mirëfilltë hetimore bënë të mundur identifikimin e një prej autorëve të ngjarjes së ndodhur në datën 29.12.2018, në fshatin Bradashesh, Elbasan, ku mbetën të vrarë me armë zjarri shtetasit E. A., A. D. dhe T. D.
Si rezultat i hetimeve të kryera, nga Seksioni për Hetimin e Krimeve Kundër Personit në Drejtorinë Vendore të Policisë Elbasan u bë shpallja në kërkim ndërkombëtar e autorit të dyshuar, shtetasi:
M. Q., 35 vjeç, i dyshuar për veprat penale “Vrasje në rrethana të tjera cilësuese” e kryer në bashkëpunim dhe “Armëmbajtja pa leje”, informon Policia e Elbasanit.
Si ndodhi ngjarja?
Ngjarja e rëndë ndodhi më 29 dhjetor 2018.
Viktimat ishin duke udhëtuar me një makinë fuoristradë me targa rumune AG 71 WYP në momentin kur ndaj tyre është qëlluar me breshëri kallashnikovi duke i lënë të vdekur në vend.
Vrasja e trefishtë ndodhi pak minuta pasi tre viktimat dhe familjarët e tyre kishin dalë nga një restorant që kishin darkuar në një restorant në zonën e Peqinit.
Makina e viktimave ka qenë në ecje në momentin e sulmit dhe pas humbjes së jetës së drejtuesit, ka dalë nga rruga duke u përplasur me një objekt. Ndërkaq, familjarët e viktimave, 5 gra dhe tre fëmijë nuk kanë pësuar dëmtime pasi ndodheshin pas fuoristradës me targa rumune që ishte objekt i sulmit.
