Futbollisti Mauro Icardi është bërë zyrtarisht një lojtar i Paris Saint Germain, pasi Interi pranoi të ulte disi pretendimet ekonomike dhe kampionët e Francës ushtruan të drejtën e blerjes së kartonit të bomberit nga Rosario.
Marrëveshja për kartonin e Icardit u arrit mbi bazën e 50 milionë eurove që do të shkojnë menjëherë në arkat e klubit zikaltër. Ndërsa 8 milionë euro të tjera do jenë plus në formë bonusesh, duke e çuar kështu në një total prej 58 milionë eurosh.
Në marrëveshje është përfshirë edhe një klauzolë se në rast se PSG vendos ta shesë Mauriton te një klub italian brenda 12 muajve të ardhshëm, do të derdhë në arkat e Interit edhe 15 milionë euro të tjera.
Siç njoftoi edhe klubi i PSG, Icardi ka firmosur me parizienët një kontratë deri në vitin 2024 me një pagë prej plot 10 milionë eurosh në sezon.
Icardi u bë kështu shitja e dytë më shtrenjtë në historinë e Interit duke kaluar dhe fenomenin Ronaldo. Para tij qëndron vetëm Zlatan Ibrahimovic, të cilin zikaltrit e shitën në vitin 2009 te Barcelona për 69,5 milionë euro.
