Telashet duket se nuk kanë fund për Zlatan Ibrahimoviç! Suedezi rrezikon një dënim të ashpër, teksa UEFA ka hapur një hetim ndaj tij.
Gazeta e njohur suedeze, “Aftonbladet” raportoi pak ditë më parë se Ibra ka shkelur kodin e etikës të FIFA-s dhe UEFA-s, pasi thuhet se është bashkëpronar i markës së basteve sportive “Bethard”, me qendër në Maltë.
Dy qeveritë e futbollit botëror dhe europian nuk lejojnë që lojtarët që marrin pjesë në garat e tyre të kenë interesa financiare në kompani të këtij lloji.
Fakti që Ibra zotëron ende aksione te “Bethard” është konfirmuar nga CEO i kompanisë për median suedeze, Erik Skarp. Nga verifikimet e bëra, është zbuluar se kompania “AB” e Ibrës zotëron afërsisht 10% të aksioneve në “Gameday Group PLC”, e cila nga ana tjetër është aksionere e vetme te kompania e basteve.
FIFA dhe UEFA e ndalojnë rreptësisht që lojtarët të marrin pjesë në kompani bastesh, të cilat kanë lidhje me futbollin.
