Nuk ka asnjë dëmtim që e ndal bomberi suedez, Zlatan Ibrahimoviç. Edhe pse pësoi një dëmtim mjaft të rëndë në muajin prill dhe humbi pjesën e mbetur të sezonit, ai asnjëherë nuk u dorëzua. Mosha ishte faktori i vetëm që bëri të dukej i pamundur riaftësimi i tij për ta parë sërish në nivele të larta në fushën e lojës, por nuk ka qenë kështu. Pas rezonancave të mbajtura pas dëmtimit, i cili ishte i pari në karrierën e sulmuesit të Manchester United, ligamenti i tij dukej i pashpresë nga doktorët, ishte i vetmi ai që besoi dhe punoi fort për tu rikthyer sërish. Në muajin dhjetor pritet që Ibra të zbresë në fushë dhe të fillojë të japë kontributin e tij për fitimin e kampionatit.
“Rikthehem për të përfunduar atë që nisa dhe e lashë në mes. Gjithçka që arrita në sezonin e parë, ku fituam tre trofe, do ta çoj më tej. Objektivi im është titulli në Premier League. Ky do të jetë synimi final me Mancehster United. Në të vërtetë, kur u dëmtova, fillimisht mendova se do të ishte shumë e lehtë për mua, sepse kurrë nuk kisha pësuar ndonjë dëmtim serioz. Por kur më diagnostikuan, të gjithë nisën të spekulonin se isha shumë i vjetër dhe se karriera ime kishte përfunduar. Arritjet e mia përgjatë viteve u kthyen në një motivim edhe më të fortë për t’i provuar vetes dhe të tjerëve se e kishin gabim. Sfidoj këdo më kapacitetin tim, po ashtu veproj edhe me trupin tim.”
Suedezi ka një karrierë të pasur në arenën Europiane pasi ka luajtur me ekipet më të mira në top 5 ligat dhe ka shkëlqyer në çdo skuadër ku ka qenë duke ngritur trofe. Arkivës së tij në futboll i mungon Gjermania, por ai asnjëherë nuk ka shfaqur interes për të luajtur në Bundesligë. Nga fusha e lojës do të largohem kur të dua un dhe si të dua un, nuk do të kushtëzohem asnjëherë nga dëmtimet, është shprehur Zlatan. Ai njihet për karakterin e tij të fortë, por edhe për formën e lartë fizike që ka pasur gjatë gjithë karrierës së tij.
“Do të dal nga fusha ashtu siç dua unë, edhe më mirë seç hyra. Edhe nëse kjo do të thotë që duhet të eci mbi ujë, do ta bëj. E sigurt është që nuk do të më shohin kurrë duke çaluar!”, ka përfunduar Ibrahimoviç.
