Shtrenjtimi i çmimeve ka zbrazur xhepat e qytetarëve, por nga ana tjetër ka mbushur arkën e shtetit. Ministrja e Ekonomisë dhe Financave, Delina Ibrahimaj, ka deklaruar se gjatë dy mujorit të parë të këtij viti, të ardhurat tatimore në arkën e shtetit janë rritur me 26 për qind krahasuar me të njëjtën periudhë të një viti më parë. Kjo është arritur falë rritjes së çmimeve.
Ministrja Ibrahimaj tha se në dy muajt e parë të 2022 ka patur rritje të të ardhurave me 18.1 miliardë lekë, ndërsa në 6 muajt e parë të 2022 do të përmbyllet i gjithë procesi i fiskalizimit. “Në dy muajt e parë janar-shkurt, kemi pasur rritje të të ardhurave me 26% krahasuar me 2021, ose e 18.1 mld lekë më shumë. Edhe reforma e fiskalizimit ka vijuar ecurinë pozitive ku biznesi i madh është pajisur me certifikatë fiskalizimi, ndërsa 81 % e biznesit të vogël ka bërë fiskalizimin. Në fund të 6 muajve të parë të 2022 do të përfundojmë fiskalizimin për të gjithë subjektet”, u shpreh ajo.
Ministrja e Financave deklaroi gjatë një konference për mediat se procesi i punësimit gjatë muajit mars ka ecur me ritme të kënaqshme. Ibrahimaj u shpreh se shifrat e të punësuarve në sektorin privat janë ritur me 1% në raport me llogaritjet e bëra në muajin dhjetor të vitit të shkuar.
“Nëse do tu referohemi shifrave paraprake të punësimit, deri në muajin mars kemi patur një ecuri të kënaqshme të tregut të punës. Presim që shifrat e punësimit të vijojnë me ritmet e dy viteve të fundit.
Biznesi i madh ka një total prej 554 306 të punësuarish ose 1% më shumë se të dhënat e dhjetorit. Shpërndarja e të punësuarve është në sektorin e shërbimeve me 52% të të punësuarve, i ndjekur nga sektori i prodhimit dhe turizmi”, tha Ibrahimaj.
Sot caktohet çmimi i orizit, miellit, sheqerit dhe vajit
Bordi i Ushqimeve do të marrë një vendim për çmimet e këtyre 4 produkteve. “Do përcaktojmë formulën për përcaktimin e çmimeve. Bordi i Ushqimeve ka vendosur që më 1 prill të mbajë nën monitorim 4 produkte. Pra mielli, orizi kokërgjatë, sheqeri dhe vaji i lulediellit. Do përcaktohet marzhi i fitimit dhe do aplikohet. Do dalim sot me disa çmime referencë. Nuk do të jetë me çmim më të lartë nga ai që vendos Bordi, do publikohen sot çmimet”, tha Ibrahimaj.
