Një 31-vjeçar ka rënë në prangat e Policisë së Fushë Krujës, pasi i vodhi me forcë një qytetareje varësen nga qafa.
Ngjarja ka ndodhur mesditën e sotme, te mbikalimi në Fushë Krujë. Raportohet se 31-vjeçari i është afruar një shtetaseje që po priste urbanin dhe i ka marrë me forcë nga qafa një varëse duke u larguar me vrap.
Bëhet fjalë për shtetasin me iniciale A.Ç., banues në Kurbin, ndërsa efektivët e policisë janë vënë në ndjekje duke bërë të mundur edhe kapjen e tij disa minuta pas ngjarjes.
Rasti i tij do të hetohet nga Prokuroria pranë Gjykatës së Shkallës së Parë Durrës, për veprën penale “Vjedhja me dhunë”.
Njoftimi i plotë i Policisë:
Ndërhyrja në kohë e Patrullës së Policisë Rrugore vë në pranga autorin, që i grabiti me forcë nga qafa varësen një shtetaseje.
Rreth orës 13:00, te mbikalimi në Fushë Krujë, një shtetase duke pritur linjën e transportit publik, i është afruar një shtetas dhe i ka marrë me forcë nga qafa varësen dhe është larguar me vrap.
Patrulla e Policisë Rrugore të DVP Durrës që ishte me shërbim në afërsi të stacionit, ka ndërhyrë menjëherë duke u vënë në ndjekje të personit. Pas disa minutash bënë të mundur kapjen e tij.
Në përfundim të veprimeve Specialistët për Hetimin e Krimit në Komisariatin e Policisë Krujë arrestuan në flagrancë shtetasin A.Ç., 31 vjeç, banues në Kurbin.
Materialet hetimore i kaluan Prokurorisë pranë Gjykatës së Shkallës së Parë Durrës në ngarkim të shtetasit të ndaluar për veprën penale “Vjedhja me dhunë”.
