Stafi mjekësor i spitalit të Durrësit është akuzuar sërish për mungesë përkujdesjeje ndaj pacientëve. Këtë herë bëhet fjalë për mjekët e Urgjencës të cilët janë akuzuar nga një qytetar, i cili pretendon se bluzat e bardha nuk kanë kryer misionin e tyre dhe për pasoje motra e tij ka ndërruar jetë në duart e tyre. Albert Doko thotë se motra e tij 56- vjeçare kishte shkuar në urgjence pasi kishte kapërdirë një sasi medikamentesh dhe për tre orë me radhë nuk është vizituar nga mjekët.
Motra e tij 56-vjecare, Ervehe Dedej kishte shkuar në urgjence dhe bluzat e bardha nuk u angazhuan aspak në këtë rast, pasi motra e tij ishte bërë me baltë teksa ishte rrezuar në një kanal në zonën e Porto Romanos.
Krahas denoncimit publik, Doko thotë se do bëjë denoncim edhe në policinë e Durrësit me qëllim që kjo e fundit të nisi hetimet për rastin në fjalë. Sipas tij, ngjarja ka ndodhur tre ditë me parë në urgjencën e spitalit të Durrësit.
Nga ana tjetër, jashtë kamerave, mjeket deklarojnë se rasti është trajtuar me përkushtim maksimal, por për fatin e keq pacientja ka ndërruar jete. Mjekësia ligjore po punon për te mësuar shkakun e vërtete të vdekjes së 56-vjecares, e cila sipas të afërmve është paraqitur e helmuar nga medikamentet qe kishte gëlltitur.
