Deputeti i Partisë Demokratike, Ervin Salianji ka fituar gjyqin në Apel ndaj Evi Kokalarit. Gjykata e Posaçme e Apelit ka shpallur Salianjin të pafajshëm në “betejën” përballë aktivistes amerikano-shqiptare Evi Kokalari. Apeli rrëzoi sot vendimin e Gjykatës së Shkallës së Parë që e kishte dënuar Salianjin për fyerje, duke e rrëzuar këtë akuzë dhe shpallur atë të pafajshëm. Salianji ishte dënuar me 50 mijë lekë. Sakaq, Apeli ka lënë në fuqi edhe vendimin e marrë nga Shkalla e Parë më 25 mars, që e shpalli të pafajshëm për akuzën e ngritur nga Kokalari se kishte shpifur ndaj saj.
Kokalari paditi Salianjin në SPAK pas akuzave se ai e kishte fyer dhe kishte shpifur duke thënë se bashkëshorti i saj është anëtar i Agimit të Artë në Greqi. Fillimisht GJKKO vendosi të dënojë Salianjin me 50 mijë lekë gjobë, por më pas Apeli vendosi të rrëzojë këtë vendim duke e shpallur demokratin të pafajshëm. Në nëntor të vitit 2021, Salianji e etiketonte Kokalarin si “skizofrene” dhe njeri pa përfaqësim.
Sipas Salianjit, bashkëshorti i Kokalarit është i përfshirë në partinë Agimi i Artë, i financuar nga qarqe antishqiptare.
“Një që ka ngjitur në Foltore Berisha, është si Shën Eleonora që e mbante veten për të shenjtë, një që ka gjithë elementët e skizofrenisë dhe ajo nuk mund të bëjë copë asnjë njeri, pasi nuk bën copë një njeri që është në këto përmasa, e zhytur shumë në këto fekalet, nuk bën dot.
Janë njerëz pa përfaqësim. Kokalari është një emigrante e papunë, bashkëshorti i saj është i përfshirë në partinë Agimi i Artë, i financuar nga qarqe antishqiptare. Janë njerëz më shumë se të shpifur, nuk kanë asnjë kontribut në PD”, shprehej Salianji.
