Zbardhet dëshmia e nënës së 13-vjeçares që u rrëmbye pasditen e të premtes në Tiranë.
Në një lidhje telefonike me “Report Tv”, e ëma tregon se e mitura është marrë me forcë poshtë pallatit, ndërsa ishte në shoqërinë e motrës. Ajo shprehet se një prej autorëve, i cili ishte i maskuar, i është afruar duke i vendosur diçka në gojë dhe e ka futur me forcë në makinë.
“Nga çfarë më ka raportuar vajza e vogël, kur ka zbritur nga furgoni rreth orës 15:15 ka qenë duke u kthyer, kur i ka lënë furgoni para pallatit, dikush i është afruar dhe i ka vënë diçka te goja dhe e ka marrë dhe e ka futur në makinë”, tregoi nëna e 13-vjeçares.
Ajo theksoi se e bija është diabetike dhe se mjekohet 4 here në ditë me insulinë, duke i bërë thirrje policisë që të gjendet sa më parë.
“Është me diabet dhe mjekohet me insulinë dhe tani që flasim duhet të bënte insulinën. Insulinë abitra dhe lancus merr në darkë, njëherë në 24 orë. Vajza është me diabet tipi 1 mjekohet me insulinë, duhet të ushqehet dhe duhet të bëjë insulinën. Tani duhet të pijë insulinë apidra, dhe insulinë lantus merr në darkë që e ka një herë në 24 orë”, tha për “Report Tv”.
Po ashtu, nëna bën me dije se nuk kanë konflikt me ndokënd.
