Gjykata e Tiranës ka dënuar me 20 vite burg Klajdi Shundin, i cili u akuzua për vrasjen e kunatit të tij Vladimir Zvezhda. Raportohet se Prokuroria kishte kërkuar 30 vite burg për 35-vjeçarin.
Si ndodhi ngjarja
Masakra ndodhi në orët e para të mëngjesit të 1 janarit të vitit 2021, në lagjen “5 Maji” në Tiranë. Autori dhe viktima festuan së bashku Vitin e Ri, dhe nën efektin e pijes nisën një konflikt të çastit që përfundoi me vrasjen e 42-vjeçarit.
Zanafilla e sherrit e cila përfundoi me vrasjen e Vladimir Zvezhdës nga kunati i tij, Klajdi Shundi, është një debat mes tyre për mikpritjen e shqiptarëve. Miku i Klajdi Shundit, ka treguar dinamikën e ngjarjes në polici. Mësohet se shoku i Klajdi Shundit është shprehur në polici se ata kishin qenë në një festë, dhe më pas po bisedonin se kush është më mikpritës, pogradecarët apo korçarët. Pasi kanë pirë disa gota verë, situata është nxehur dhe Klajdi i kërkoi kunatit që të mos ngrejë zërin në shtëpinë e tij. Vladimiri kishte mbetur i ofenduar nga kunati i tij. Kishte marrë fëmijët dhe gruan e ishte larguar nga shtëpia.
