Fatmir Manellari, i shpallur në kërkim prej 2 muajsh është arrestuar në Pogradec. Ai akuzohet për vrasjen me thikë të bashkëfshatarit të tij, Safet Hyskollari.
Manellari ka qenduar i fshehur në pyll për rreth dy muaj. Ai u arrestua mbrëmë, sapo u kthye në shtëpinë e tij fshatin Zdërvaskë.
Safet Hyskollari jetonte me gruan e tij, ndërsa kishte pak ditë që ishte kthyer nga SHBA-ja. Fatmir Manellari 63 vjeç ka goditur me thikë 65-vjeçarin Safet Hyskollarin në derën e banesës së tij, i cili pasi është dërguar në spital ndërroi jetë nga plaga e marrë.
Konflikti për pronën ndërmjet të dy bashkëfshatarëve ka qenë i vazhdueshëm, ku më herët të dy janë përplasur edhe fizikisht.
Ngjarja e rëndë ka ndodhur mbrëmjen e datës 9 shtator, ku Manellari ka shkuar në banesën e Safet Hyskollarit dhe e ka goditur për vdekje në pragun e shtëpisë së tij.
Një nga miqtë e viktimës ka deklaruar më herët se Safet Hyskollari ishte kthyer para një viti nga Amerika dhe në komunitet njihej si një person i qetë, ndërsa jetonte i vetëm me bashkëshorten e tij. Ndërkohë një tjetër banor është shprehur për autorin se nuk njihej si njeri i mirë në komunitet.
