Goditja me një thikë në zemër ka qenë fatale për një 54-vjeçar, i cili u vra nga personi që kishte denoncuar në polici, për vjedhjen e një shume parash.
Ngjarja e rëndë ndodhi në vendin e quajtur “Ura e Thive”, në lagjen “Mark Lula”, afër banesës së viktimës Prendush Fushaj. Pas kësaj vrasje, policia dyshon se autori është shtetasi Fredi Pllumi.
Burimet policore bëjnë me dije se gjatë ditëve të fundit, në banesën e viktimës është vjedhur një shumë e konsiderueshme parash. Pas kësaj ngjarje, viktima Fushaj ka shkuar në rajonin e policisë, dhe ka bërë një denoncim, duke përmendur si autor të mundshëm të vjedhjes pikërisht 30-vjeçarin Fredi Pllumi dhe disa persona të tjerë.
Menjëherë pas këtij denoncimi, forcat e policisë kanë shoqëruar të dyshuarin si autor të vjedhjes, por ai ka deklaruar për oficerët se nuk ka gisht në këtë vjedhje. Policia, duke mos pasur prova për autorësinë e vjedhjes, e ka lënë të lirë 30-vjeçarin.
https://tiranatoday.com/vret-fqinjin-per-vjedhje-lekesh-viktimes-iu-vu-eksploziv-ne-2013/
Dyshohet se ai ka shkuar pasditen e djeshme në banesën e Prendush Fushajt, duke i kërkuar llogari në lidhje me padinë për vjedhje, që ka bërë në adresë të tij. 30-vjeçari ia ka mohuar se është ai autor i vjedhjes, por dyshohet se 54- vjeçari nuk është bindur nga fjalët e tij.
Po të njëjtat burime dyshojnë se shtetasi Fredi Pllumi ka nxjerrë një thikë që e kishte me vete, dhe ka goditur në zemër Fushajn, i cili mbeti i plagosur rëndë dhe më pas humbi jetën në Spitalin Rajonal të Shkodrës.
