Trukimet e ndeshjeve janë kthyer në një problem për futbollin, por duket se kjo skemë mashtrimi ka prekur edhe Shqipërinë. Ish-presidentja e klubit sportiv “Kastrioti” Anisa Hysa i ka marrë 10 mijë euro nipit të kolegut të saj, Fehmi Meziu, administrator i ekipit “Korabi” e premtimin se do të luante baste të sigurta në Angli.
Me premtimin se paratë do t’i luante në Angli me baste të sigurta, ish-presidentja e klubit sportiv “Kastrioti” Anisa Hysa, i zhvati 10 mijë euro, nipit të kolegut të saj, Fehmi Meziu, administrator i ekipit “Korabi”.
Gjithçka nisi në fushën e blertë në 2016, kur dy ekipet e kategorisë së parë asokohe, stërviteshin në të njëjtin kompleks në Pezë Helmës. Fehmi Mziu shoqërohej nga nipi i tij, Arjani, kur u takua me rivalen e tij, Hysa. 32-vjeçarja dhe Arjan Mziu, diskutuan të bënin biznes bashkë dhe për këtë arsye u takuan disa herë radhazi.
Nipi i administratorit të Korabit, mesa duket është bindur nga premtimet që i kishte bërë 32-vjeçarja e për këtë arsye i jep cash 10 mijë euro, me qëllim që të luheshin në baste dhe duke qenë së flitej për ndeshje të sigurta, pra rezultate të paracaktuara, fitimi do të ishte i sigurt.
Por jo çdo gjë ka shkuar sipas parashikimeve. Ndonëse i jep cash shumën e kërkuar nga drejtuesja e Kastriotit të Krujës në atë kohë, Arjan Mziu nuk merr asnjë lek mbrapsht dhe menjëherë i lind dyshimi se kishte rënë pre e mashtrimit, shkruan Balkaweb.
Pasi dështon në tentativat për të marrë lekët e tij, ai kërkon edhe ndihmën e xhaxhait, përmes të cilit e njohu Anisa Hysën. Pas disa takimesh me 32-vjeçaren, e cila kërkonte kohë për t’i kthyer paratë, administrator i Korabit dorëzohet dhe vendosi të ndjekë çështjen në rrugë ligjore. Në komisariatin numër 4 Anisa Hysa denoncohet për mashtrim nga vëllai i të dëmtuarit pasi vetë Arjan Mziu ndodhej jashtë vendit, i sëmurë. Pas disa muajsh hetime, prokuroria dërgoi dosjen në gjykatën e Tiranës, ku Anisa Hysa akuzohet dhe po gjykohet në gjendje të lirë për akuzën e mashtrimit.
