Kreu i PD-së, Lulzim Basha insiston në faktin se duhen bërë më shumë testime, për të kuptuar më mirë se në çfarë gjendje ndodhemi në lidhje me koronavirusin.
Në një intervistë për News24, Basha tha se i ka kërkuar Shteteve të Bashkuara, Bashkimit Evropian dhe OBSH-së që ta ndihmojnë Shqipërinë për testimin ndaj COVID-19.
Sipas Bashës, situata është më e rëndë në përhapjen e këtij virusi, teksa shton se një tjetër problem mbeten familjet që ende sipas tij nuk kanë marrë mbështetje nga qeveria.
“Ne prodhuam 5 hapat, që sipas nesh, përbëjnë daljen e vendit nga kriza. Këto pesë hapa i kemi ndërtuar në bashkëpunim me ekspertizën e vendeve, që po korrin sukses në këtë periudhë. Hapi i parë është të dimë ku ndodhemi realisht. Duhen bërë më shumë testime për këtë. Është gënjeshtër që OBSH të ketë thënë mos të bëhen teste. Unë i kam kërkuar SHBA, BE, por edhe OBSH të nda ndihmojnë për testimin. Qeveria nuk ka ndërmarrë asnjë masë. Sa më shumë teste të bëhen, aq më shumë të infektuar do të ketë.
Situata është shumë më e rëndë në përhapjen e përmasave të infeksionit dhe dhjetëra herë më e rëndë në katastrofën ekonomike, sepse familjet nuk kanë marrë mbështetje. Qeveria ka para, por Rama ka vendosur që këto para të vazhdojë t’ua lërë në duar dhjetë oligarkëve. Ky është problemi. Ndodhemi sot në një situatë që nuk ka të ngjarë me asnjë vend të rajonit. Shqipëria është vendi ku qeveria nuk ka ngritur as gishtin më të vogël për të ndihmuar familjet, biznesin, por i ushqen me lugë bosh, për të shmangur dështimin total”, tha ai.
