Pranvera Paçi e njohur ndryshe si studentja e cila i derdhi bojë në kokë rektorit Adem Bekteshi, është pezulluar nga ky vit shkollor.
Vendimi është marrë nga Këshilli i Etikës në Universitetin e Shkodrës “Luigj Gurakuqi”, i cili ka vendosur të marrë këtë masë disiplinore për ngjarjen e ndodhur më datë 10 maj.
Studentja në fjalë, menjëherë pas ngjarjes u shpreh në lidhje me arsyet se pse kishte derdhur bojë ndaj rektorit. Sipas saj arsyeja kryesore pse e mori këtë vendim ishte se ai kishte anuluar takimin e zv. ndihmës Sekretarit të Shtetit amerikan, i cili do shkonte në Shkodër për problematikat e studentëve.
Sipas saj, rektori anuloi takimin me arsyetimin se studentja kishte marrë me dhunë sallën në të cilën do të zhvillohej takimi, gjë që Paçi shprehet se nuk është e vërtetë.
“Arsyeja e ndërmarrjes së këtij hapi ishte pas dhënies së vendimit për pezullim ndaj bashkë protestues time dhe një arsye tjetër kryesore është që anuloi takimin e zv. ndihmës Sekretarit të Shtetit amerikan i cili do vinte në Shkodër në lidhje me problematikat e tona, përgjigje që ju dha amerikanit ishte se unë si protestuese kryesore e paskam kërcënuar dhe marrë me dhunë sallën, arsye qe nuk u zhvillua takimi”, shprehej Pranvera Paçi.
Si pasojë e këtij vendimi studentja do të detyrohet që të përsërisë vitin akademik pasi ajo nuk do të lejohet të hyjë në provimet e fundit.
