Ilir Meta ka reaguar pas letrës së Autoritetit të Dosjeve, se ai rezulton si bashkëpunëtor i ish-Sigurimit të Shtetit. Në një konferencë për mediat nga selia e “Partisë së Lirisë”, Meta e quajti të manipuluar, dhe tha se i ka mbërritur një e-mail anonim. Ish-presidenti Ilir Meta u shpreh se ky akt është për të ardhur keq, pasi tregon manipulimin e kriminalizimin të dosjeve, ndërsa akuzoi kryeparlamentaren Lindita Nikolla se po përdoret nga kryeministri Rama.
“Si mund t’i shmangem një përgjigje, pavarësisht se nuk ka shqiptar mbi këtë tokë që nuk e kupton se me këtë akt vetëvrasës, sepse Autoriteti i Dosjeve para se të jetë autoritet ligjor, është autoritet moral. Ty të është besuar që të trajtosh me kujdes të shkuarën e dhimbshme të popullit. Personat që janë implikuar në mënyrë të vullnetshme dhe kërkojnë t’i shpëtojnë filtrit dhe të vazhdojnë të kontribuojnë në jetën publike në vend, njëkohësisht dhe të ngushëllosh viktimat e asaj periudhe që kishin ato pasoja nga sigurimi dhe bashkëpunëtorët e tij. Kjo është për të ardhur keq për Autoritetin. Ata e dinë më mirë se kushdo se çfarë ka dhe çfarë s’ka dhe sa e vërtetë dhe sa e manipuluar janë ato dosje. Një e-mail anonim elektronik që jam i sigurt që kur të bëhet public, do të gajaseni të gjithë nga qenka zbuluar dhe normalisht sipas lojërave të qëllimshme nga Autoriteti dhe Parlamenti dhe mediat e inceneratorëve që ‘lëshojnë’ bombat. E dini se ça bombash e kam fjalën. U zbulua se pas 30 e ca vjetësh I.M qenka ky njeri që në mars të ‘92 u bë deputet dhe iu është nënshtruar filtrave dhe komisioneve të të gjitha kohëve. Që nga komisionet e Berishës, që se kaloi gjysma e asaj partie që isha unë atëherë dhe është kthyer në parti patronazhistësh, sigurimsash dhe fuksash dhe deri te koha e Nanos dhe tani. Për çfarë bëhet kjo? Çfarë i kushtonte Autoritetit që është shqetësuar që të thërriste I.M që është Ilir Metaj, Ilir Rezhep Metaj. S’jam President që të bëj zhurmë, s’jam as deputet dhe përse u dashka të bëhet një ligj i posaçëm për këtë I.M?! A ka njeri që e beson këtë gjë?! Patjetër u ngrit Parlamenti në këmbë. Cili Parlament? Parlamenti me në krye zonjën Nikolla apo Lindita e Ramës në Parlament që përdoret për nevoja personale të tij, siç është urgjenca për të spostuar vëmendjen nga afera më e zezë dhe më flagrante”, tha Meta.
