Xhuliano Bullari, 25-vjeç, u gjet pa shenja jete teksa kishte marrë tre plumba, një prej tyre në kokë. Viktima u gjet në fshatin Babicë të Vlorës, ndërsa ndodhej brenda një makine. Kanë qënë familjarët, ata që kanë konfirmuar identitetin e tij. I ndjeri u gjet i vdekur nga policia mëngjesin e sotëm, rreth orës 07:35, në një makinë tip ‘Fiat Punto’ me targa TR 3437 R, në aksin Vlorë-Babicë.
Banorët njoftojnë policinë
Kanë qenë banorët e zonës ata që kanë gjetur fillimisht trupin e pajetë, dhe më pas kanë njoftuar policinë. I riu është ekzekutuar në një rrugë të thellë, ku nuk ka banesa afër, gjë që shton dyshimet e grupit hetimor se ai mund të jetë nxjerrë në pritë.
Nuk dihet se sa persona mund të kenë marrë pjesë në ekzekutim. Dyshohet se ai është ekzekutuar me armë zjarri nga disa persona, pasi u gjetën tre plumba.
Viktima me origjinë nga Elbasani, banonte në Tiranë
25-vjeçari i cili u gjet brenda makinës, është me origjinë nga Elbasani, mirëpo banonte në Tiranë në zonën e Babrrusë.
Viktima, i dënuar në 2018 për “trafikim klandestinësh”
Xhuliano Bullari ka qënë i dënuar në vitin 2018 për “trafikim klandestinësh”. “Në lagjen “Sheq i Madh” u gjetën tre sirianë në mjetin e Xhuljan Bullari, 22-vjeç, po nga Tirana”, thuhej në njoftimin e policisë në vitin 2018.
Çfarë njoftonte sot policia
“Më datë 21.08.2021, rreth orës 07:35, në aksin rrugor Vlorë-Babicë, në rrethana ende të paqarta, është gjetur pa shenja jete brenda në automjet, një shtetas ende i paidentifikuar, rreth 25 vjeç, dyshohet se ka humbur jetën nga përdorimi i armës së zjarrit. Shërbimet e Policisë kanë mbërritur menjëherë në vendngjarje. Grupi hetimor nën drejtimin e Prokurorisë po vijojnë punën për zbardhjen e plotë të rrethanave të ngjarjes”, bën me dije policia. /Tirana Today
