Një i dënuar nga burgu i Shënkollit ka treguar tmerrin e përjetuar nga tërmeti 6.4 ballë, mëngjesin e ditës së djeshme (26 nëntor).
Në një prononcim për “News24”, i dënuari thotë se burgu, ku po qëndron i izoluar ka marrë shumë dëmtime dhe jeta e të burgosurve është e pasigurt.
Ai rrëfen se policia e burgut i ka bërë presion që të futen brenda duke i kërcënuar se do t’i dhunojnë.
I dënuari thotë se gjendja e burgut, pavarësisht se policët thonë nuk ka probleme, është tejet e rënduar sepse godina ka lëvizur nga vendi, edhe për pasojë edhe tullat.
“Është plasarit godina nga tërmeti. Mbrëmë na kanë ardhur natën dhe kanë dashur të na ushtrojnë dhunë, do t’ju rrahim. Godina e burgut është plasarit dhe ka pësuar çarje në të gjitha anët.
E ndjejmë jetën të pasigurt. Ne kemi dalë prej hallit, nuk kemi dalë prej qejfit. Vjen policia e burgut dhe na thonë futuni brenda me forcë ose do sjellim DAP-in nga Tirana të ushtrojë dhunë ndaj jush. Kanë ardhur mbrëmë me dhunë me na fut brenda. Ka ardhur drejtori i burgut duke ushtruar dhunë. Kemi shumë probleme. Kemi frikë të qëndrojmë brenda. Janë çarë muret, kanë lëvizur tullat.
Dhomat kanë lëvizur. S’po i kërkojmë të na lirojnë, vetëm të na sigurojë jetën”, tha i dënuari.
