Disa javë më parë, mjeku Dhimitër Kraja u infektua me koronavirus. Djali i tij Dj Viki, sikundër edhe familjarët e tij, e kanë patur tejet të vështirë për ta kaluar këtë situatë.
Në një lidhje direkte për emisionin “Shqipëria Live”, Dj Viki ka treguar se i ati është në gjendje shumë të mirë shëndetësore, dhe është rikthyer në detyrë. Po ashtu ai ka rrëfyer se i ka ardhur si bombë momenti kur ka zbuluar se i ati ishte infektuar me COVID-19.
“Doktori është zjarr, është rikthyer prapë në punë. Ka rreth 4-5 ditë që është rikthyer, madje që të hënën pasi kaloi dhe kohën e karantinës. Po i shërben shqiptarëve.
Isha njoftuar pak a shumë që babai kishte koronavirus. Por kur doli nëpër media, kur e pashë lajmin në televizor u shqetësova, më ra si bombë. Ishte një ndjesi shumë shokuese”, ka treguar Viki.
Kujtojmë këtu faktin se mjeku Dhimitër Kraja u rikthye në sistemin e shëndetësisë, për të ndihmuar kolegët e tij, që të përballonin luftën me koronavirusin.
