Policia ka arrestuar prokurorin e Prokurorisë së Kukësit, Edmond Kariqi. Ngjarja ka ndodhur në shëtitoren e qytetit të Kavajës, teksa sipas informacioneve paraprake, operacioni u zhvillua pas hetimit të kryer nga Prokuroria e Posaçme kundër Korrupsionit dhe Krimit të Organizuar.
Dyshohet se arrestimet janë kryer për një rast korrupsioni. Ndaj prokurorit, është urdhëruar edhe kontroll banese. Bashkë me Kariqin është vënë në pranga edhe shoferi i tij, Isuf Bega, pasi dyshohet se ka bashkëpunuar me zyrtarin e drejtësisë.
“Nga veprimet e kryera për këtë procedim penal në bashkëpunim me policinë gjyqësore të Drejtorisë të Policisë së Shtetit, janë siguruar dhe janë mbledhur prova konkrete, nga të cilat janë krijuar dyshime të arsyeshme se shtetasi Edmond Kariqi, në cilësinë e Drejtuesit të Prokurorisë pranë Gjykatës së Shkallës së Parë Kukës ka kërkuar dhe ka marrë përfitime monetare të parregullta, me qëllim për të favorizuar disa persona nën hetim, të cilët kanë qenë duke u hetuar në Prokurorinë pranë Gjykatës së Shkallës së Parë Kukës” informon SPAK.
Edmond Karriqi është prokurori që hetoi çështjen e këngëtares Fjolla Morna që u kap me armë zjarri në pikën kufitare të Morinës. Ajo ndodhet në arrati edhe pse është dënuar në mungesë. Nuk dihet nëse çështja e Morinës ka të bëjë me prangosjen e prokurorit ditën e sotme.
