Skënder Hyseni, ministri i Brendshëm në detyrë, ka thënë se në shtator Kosova do të jetë pjesë e Interpol.
Sipas Hysenit, zyrtarët e Republikës së Kosovës i kanë bërë të gjitha përgatitjet e nevojshme me qëllim që këtë vit Kosova të jetë anëtare e Interpolit.
Kështu, Ministria e Punëve të Brendshme tashmë ka krijuar ekipin i cili po punon për këtë arritje, në mënyrë që të marrë mbështetjen e nevojshme për anëtarësimin në këtë organizatë ndërkombëtare të sigurisë.
Mediet në Beograd raportuan së fundmi se shteti serb ka formuar mekanizma shtetërorë, me qëllim që ta pengojë rrugën e Kosovës drejt anëtarësimit në Interpol.
Megjithatë, Kosova i ka bërë tashmë të gjitha përgatitjet për anëtarësim në Interpol. Sipas Hysenit, po vazhdohet të punohet për identifikimin e vendeve për lobim, me qëllim që shteti ynë në shtator të këtij viti të jetë anëtarja më e re e Interpolit.
Republikës së Kosovës i nevojiten dy të tretat e votave të shteteve të pranishme në Asamblenë e Përgjithshme të Interpolit që do të mbahet në Pekin.
