Elseid Hysaj-Napoli varet nga Maurizio Sarri dhe kjo jo për minutazhin apo për çështje taktike, por me qëndrimin e trajnerit në ekip. Ishte Sarri që bëri të mundur kalimin e tij nga Empoli tek skuadra nga Campania dhe duket se lidhje mes tyre tashmë është bërë shumë e fortë. Këtë gjë e ka konfirmuar agjenti i lojtarit, Mario Giuffredi, i cili habiti me deklaratën e tij për mediat. “Merkatoja e verës e Napolit do të varet nga qëndrimi ose jo i Maurizio Sarrit në pankinën e të kaltërve. Mendoj se në këtë moment të gjithë duhet të mendojnë për të fituar titullin.”
Hysaj është një ndër të preferuarit e Jose Mourinhos për krahun pasi i përshtatet mjaft mirë skemës së tij të lojës dhe ka karakteristikat që ai kërkon në fazën mbrojtëse. Por destinacioni i tij i ardhshëm mund të jetë edhe Arsenali, nëse “Topçinjtë” zgjedhin si zëvendësues të Wengerit, Sarrin. Por ky i fundit ka qenë mjaft i lidhur edhe me ekipe të tjera gjigante si Realit të Madridit, Chelsea-t apo Atleticos së Madridit.
Kontrata e Hysajt me Napolin ka edhe shumë vite brenda, pasi i skadon në 2021, por kjo nuk është e thënë që ai të presë fundin e kontratës për të bërë një lëvizje në karrierën e tij. Nuk ka edhe shenja për ndonjë rinovim të mundshëm dhe duket se të gjitha këto do të varen nga vendimi që do të marrë Maurizio Sarri në verë, nëse do të vazhdojë të drejtojë napolitanët apo do të zgjedhë një eksperiencë të re.
