Napoli është duke kaluar një formë mjaftë të mirë në këto 10 javë të para në kampionat. At kanë arritur të fitojnë nëntë ndeshje dhe kanë marrë vetëm një barazim, duke mbajtur vendin e parë. Tashmë ata cilësohen si pretendentë për titull edhe pse lufta për vendin e parë në Serie A është shumë e hapur dhe një gabim të bën të biesh disa vende më poshtë. Por karakteri që kanë treguar napolitanët, pjesë e të cilëve është edhe lojtari i kombëtares shqiptare, Elseid Hysaj, të bën të besosh se ata do të luftojnë deri në fund. Skuadra e drejtuar nga Sarri dëshiron që të bëjë realitet fitimin e titullit kampion që i mungon qytetit të Napolit prej vitesh.
Për këtë çështje ka ndaluar të flasë mbrojtësi shkodran Hysaj për radio “Kiss Kiss Napoli”, ku është shprehur se do të ishte e paimagjinueshme festa që do bëhej në rast fitimi të kampionatit. “Nuk mund ta imagjinoj se çfarë mund të ndodhë në qytetin e Napolit nëse ne fitojmë titullin kampion. Misioni kryesor është të bëjmë të lumtur tifozët e mrekullueshëm, që nuk festojnë prej kohësh.”
/cdn.vox-cdn.com/uploads/chorus_image/image/57189235/862481860.0.jpg)
Hysaj ka folur edhe për sfidën e radhës në Champions League që kanë përballë Manchester City dhe e cilëson si një ndeshje ndër më të vështirat. Thur elozhe edhe për Sane i cili do të bëhet një futbollist i madh. “Personalisht ndihem shumë mirë dhe uroj që sa më shpejt të shënoj golin tim të parë me Napolin. Ndeshja e ardhshme në Champions? Kam luajtur kundër shumë futbollistëve të aftë në karrierën time, por Sane i City është dikush për të cilin do të dëgjojmë të flitet shumë në të ardhshmen. E kam studiuar si luan dhe shpresoj ta ndalojë”, ka përfunduar mbrojtësi i Napolit.
