Trajneri i Kamzës, Ramadan Ndreu, nuk i ka kursyer kritikat në përfundim të ndeshjes së humbur 1-0 ndaj Kukësit në “Zeqir Ymeri” e cila ishte e para për edicionin e ri të Superligës. Numri 1 i pankinës është shprehur se gjendja e fushës është e mjerueshme dhe se futbollistët luajtën në beton.
Ndreu gjithashtu kishte edhe pakënaqësi ndaj gjyqtarëve. Jo për momentin e penalltisë por për rastet e krijuara gjatë lojës. Ai pohoi se ata duhet të tregohen më korrektë. “Kështu e ka futbolli, megjithatë si ndeshje e parë, sot mendoj se pjesa më e madhe e skuadrës dha maksimumin, jemi në hapat e para, kemi nevojë për harmonizim, për grupin. Vështirësia sot ishte që përpara kishim skuadër shumë të mirë. Ishte shumë më e mobilizuar pas një disfate, pas ndeshjes me Tiranën. Unë e shoh që shtoi angazhimin. Mendoj se si ndeshje e parë jemi “ok”, në ndeshjet në vazhdim të shohim të jemi të kujdesshëm, edhe për formacionin. Kemi pasur pak kohë, janë ndeshjet që do të vendosin lojtarët cilësore. Por jemi në hapat e parë. Një skuadër nga fillimi i duhen 4-5 javë, jo me humbje, por të dalë në lojë, mendoj se ky grup do të jetë në ekipet e mira”.
Fusha
“Të jem i sinqertë, është një fushë e mjerueshme, është beton dhe ul shumë cilësinë e lojës, sidomos atë agresive, nuk ta lejon”.
Gjykimi i Kridens Metës
“Penalltinë kolegët më thanë që ishte, ndoshta ishte, por ai ishte momenti që ndau lojën, nëse ka qenë e saktë. Për 2-3 momente të tjera duhej të ishte më korrekt. Aq është futbolli, ndihma është në limite, unë mendoj se duhet të mos mendojmë më që kjo është fusha e kësaj skuadre e të ndihmojmë edhe kaq pak, duhet të jenë të gjithë korrektë.”-u shpreh Ndreu për “Super sport”.
