Prej më shumë se 14 orësh po vijojnë kërkimet për gjetjen e dy turistëve hungarezë, të cilët u zhdukën mbrëmjen e kaluar në zonën e Karaburunit, në Vlorë. Raportohet se çifti në fjalë i ka kërkuar ndihmë policisë përmes telefonit, i cili më pas ka rezultuar të jetë i fikur.
Njoftimi i Policisë: “Vlorë. Sot rreth orës 20:00, jemi njoftuar se në zonën e Karaburunit dyshohet se kanë humbur rrugën një çift hungarezësh. Automjeti i cili është marrë me qira nga ana e tyre ndodhet i parkuar pranë zyrave të zonave të mbrojtura, Vlorë.
Ata janë rreth moshës 35 – 40 vjeç dhe kanë kërkuar ndihmë nëpërmjet celularit i cili rezulton i fikur më pas. Janë ngritur grupe kërkimi nga Drejtoria Vendore e Policisë Vlorë, Policia Kufitare Vlorë nëpërmjet mjeteve lundruese dhe Repartit Delta. Po punohet për gjetjen e tyre”.
