Krerët e grupeve të PD e LSI kallëzuan në Prokurori kryeministrin Edi Rama, për kërcënim ndaj oficerit të policisë Emiljano Nuhu. Padia në fjalë u depozitua në Prokurorinë e Tiranës, nga ana e kreut të Grupit Parlamentar të PD, Edmond Spaho, dhe ai i LSI, Petrit Vasili. Opozita e paditi kryeministrin, pas kërcënimit publik ndaj ish-oficerit Emiljano Nuhu, pasi ai e cilësoi një “horrr”, dhe se do ta ndiqte rastin e tij “këmba këmbës”.
Në një prononcim për mediat, Spaho tha se mbi kryeministrin Rama rëndojnë 3 vepra penale. “Rama kërcënoi oficerin Nuhu, me këtë deklarim publik, kryeministri ka kërcënuar komisarin në kushtet e të qenurit në punë. Ka ndërhyrë në hetim, duke e paracaktuar hetimin. Ai nëpërmjet këtij deklarimi ka ndërhyrë në hetim. Mbi Ramën rëndojnë 3 vepra penale, “kanosje për shkak të detyrës”, “veprime për fshehjen e së vërtetës”, dhe “kanosjes për të mos kallëzuar”.
