Ashtu si ishte paralajmëruar, parlamenti i Holandës ka votuar pro propozimit për rikthimin e vizave me Shqipërinë për shkak të kriminalitetit të shtuar.
5 parti politike, VVD, CDA, PVV, SP, CU kanë bërë bashkë 92 deputetë, nga 150, duke votuar kështu me shumicë votash kërkesën për rikthim vizash për Shqipërinë.
Por heqjen e vizave nga vendet Schengen nuk e vendos Parlamenti i Holandës, por ai i BE. 5 partitë në Holandë kërkojnë pezullimin e përkohshëm të vizave për shkak të kriminalitetit të shtuar.
Vlen të theksohet se Partia VVD, CDA dhe CU janë 3 nga 4 partitë të qeverisjes. Ministri i Jashtëm Holandez vjen nga Partia VVD, ndërsa Ministri Grapperhaus, i cili ishte në Shqipëri, vjen nga Partia CDA.
Qeveria Holandeze ka qenë jo në favor të rikthimit të vizave; në këtë moment, për shqiptarët. Këtë qëndrim e kanë shprehur dhe në Tiranë. Ata kanë kërkuar një bashkëpunim më të mirë dhe një shkëmbim më të mirë informacioni.
Ky vendim ka ardhur në një moment kur Shqipëria aspiron që në muajt në vazhdim të çeli negociatat për integrimin në Bashkimin Europian.
