Komisioni Evropian konfirmon se ka nisur shqyrtimi i kërkesës, dërguar nga Holanda për pezullimin e liberalizimit të vizave për Shqipërinë.
Zëdhënësja e KE-së, Natasha Bertaud, deklaroi se KE-ja do të vlerësojë me kujdes përmbajtjen e njoftimit, bazuar në informacionet relevante.
“Ne konfirmojmë që kemi marrë njoftimin e Holandës për Shqipërinë lidhur me aktivizimin e mekanizmit të pezullimit së vizave. Komisioni tani do të shqyrtojë me kujdes brendësinë e njoftimit bazuar në të dhënat e paraqitura dhe rrethanat specifike. Hapi i ardhshëm i yni është të informojë Parlamentin Evropian dhe Këshillin Evropian për këtë njoftim dhe të shqyrtojmë njoftimin. Sigurisht që vendimi për pezullimin e lëvizjes së lirë nuk mund të merret lehtësisht dhe çdo hap drejt aktivizimit të këtij mekanizmi do t’i nënshtrohet një analize dhe shqyrtimi shumë të kujdesshëm, kryesisht lidhur me marrjen në konsideratë të kritereve të përfshira në këtë procedurë”, tha Bertaud.
Kërkesa është paraqitur zyrtarisht në 31 maj. Kjo është një nismë e disa deputetëve holandezë, që e argumentojnë një lëvizje të tillë me rritjen e aktiviteteve kriminale të mafias shqiptare në Holandë. Sipas ligjvënësve në fjalë, këto organizata e keqpërdorin mundësinë e udhëtimit pa viza në Evropë dhe në këtë mënyrë e zgjerojnë rrjetin e tyre të kontrabandës.
Ndër të tjera, Bertaud shtoi se vendimi për pezullimin e regjimit pa viza nuk mund të merret dhe aq lehtë.
