Kontrollet e befasishme të RENEA-s në Fier për kapjen e personave në kërkim, janë finalizuar me arrestimin e një të riu. Në pranga është vënë 27-vjeçari Indrit Hoxhaj, person me precedent kriminal në fushën e krimeve kundër jetës, drogës e armëmbajtjes pa leje. Ai është arrestuar në ambientet e një lokali në ‘Fermë Çlirim’.
Sapo ka parë forcat RENEA, 27-vjeçari ka hedhur nga dritarja e lokalit çantën e dorës brenda së cilës mbante një armë zjarri pistoletë. Gjatë kqyrjes së çantës, shërbimet e policisë gjetën në brendësi të saj armën e zjarrit pistoletë me dy karikatorë me fishekë luftarakë dhe kartën e identitetit të 27-vjeçarit.
Në përfundim të veprimeve u bë arrestimi në flagrancë i 27-vjeçarit, për veprën penale “Armëmbajtja pa leje” dhe materialet i kaluan Prokurorisë pranë Gjykatës së Shkallës së Parë Fier, për veprime të mëtejshme.
