Duke kujtuar 7 prillin, zv.kryeministri Erion Braçe shkruante në Instagram se 80 vite më parë, Shqipëria u pushtua nga Fashizmi, ndërkohë që kjo datë, sipas tij, ishte për të kujtuar tradhtarët. Braçe akuzonte mbretin Zog që ishte në tryezë në krah të Viktor Emanuelit.
Pas qëndrimit të Braçes, ka ardhur edhe një reagim nga ana e historianit Kastriot Dervishi. Ai që në krye të herës tallet me Braçen, duke e këshilluar që të mos merret me histori.
“Zëvendëskryeministri Braçe postoi një tekst të dobët në formën e traktit model “pksh41” në kujtim të 7 prillit 1939, të cilit i kish lidhur një fotografi, të cilës as ia kishte haberin çfarë ishte”, shkruan ai më tej, si për të përforcuar mendimin e tij.
Historiani e gjen të udhës të japë sqarime më të detajuara. Ai bën me dije se në vitin 1946, Viktor Emanuli III dhe Mbreti Zog gjendeshin miq të mbretit të Egjiptit. Italiani kërkoi të takohej me Mbretin Zog. Pasi ky i fundit pranoi, italiani kërkoi falje për pushtimin fashist të 7 prillit 1939.
Për rrjedhojë, nuk do kishte drekë pa aktin e faljes që italiani edhe mund të mos e jepte. Në drekë kanë qenë të pranishëm edhe nga familja mbretërore e Egjiptit. Po kështu, gjatë kësaj dreke janë shkrepur disa fotografi, të cilat janë pjesë e një albumi që posedon familja mbretërore.
