Pak kohë më parë historia e atletit tetraplegjik, Oskar de Pelegrin, bëri bujë në media.
Atleti italian fitoi medaljen para-olimpike në lojërat “Londër 2012” në garën e gjuajtjes me hark, por më pas ajo iu vodh nga grabitësit shqiptarë në banesën e tij, në provincën e Belunos.
Oskar de Pelegrin zgjodhi ta bëjë rastin publik, duke treguar kutinë bosh të medaljes. Gjatë inspektimeve, janë gjetur një sërë gjurmësh gishtërinjsh dhe pas hetimeve disamujore, polica ka konfirmuar se në bashkëpunim me kolegët shqiptarë, ka arritur të lokalizojë medaljen e vjedhur në vendin tonë.
Çuditërisht, kjo medalje e atletit italian përfundoi pikërisht në duart e Artan Lames, një prej koleksionistëve më të njohur në vendin tonë.
Lame organizoi një ceremoni për dorëzimin e medaljes, ndërsa tregoi se si kishte rënë në duart e tij.
Ai u shpreh se këtë medalje e kishte gjetur në një mënyrë fare rastësore gjatë kërkimeve të tij të zakonshme si koleksionist nëpër tregjet e mallrave të përdorur, ndërsa pasi konstatoi se për çfarë bëhej fjalë, ai u lidh në kontakt me ambasadën Italiane për t’ia kthyer sërish medaljen të zotit.
“Nuk mund të jesh koleksionit nëse nuk gërmon çdo ditë. Në një nga gërmimet e mia të përjavshme, shoh midis shumë gjërave të vjetra të hedhura përtokë dhe një medalje që në fillim mendova se ishte prej alumini dhe pa e kuptuar mirë e mora dhe e bleva. Më pas në shtëpi u mora me pastrimin e saj dhe sa më shumë që e vrojtoja kuptoja që ishte diçka me vlerë, pasi shikoja vulat dhe stampat, dhe të gjithë pjesën që është e padukshme për një sy normal dhe konstatova që ishte një medalje olimpike. Dhe me anë të kërkimeve në internet gjeta se kush e ka fituar këtë medalje dhe duke vazhduar e gërmuar arrita tek emri i zotit Oskar de Pelegrin. Kërkoj sërish në internet për këtë emër dhe në fakt kishte shumë foto të tij me medalje në qafë dhe menjëherë të binte në sy një tjetër foto ku sportisti tregonte një kuti të zbrazur, dhe lajmi thoshte “Vidhet medalja e Oskar de Pelegrin”. Aty e kuptova në fakt që kisha në dorë medaljen e tij, menjëherë vendimi i parë që më erdhi në mend ishte për t’ia kthyer të zotit. Më pas hyra në kontakt me ambasadorin Italian dhe i shpjegova të gjithë historinë, për ta vazhduar pjesën tjetër të kontakteve me zotin De Pelegrin”, tha Artan Lame, gjatë ceremonisë së dorëzimit të medaljes ambasadës Italiane.
