Ditën e djeshme u publikua një video, ku kreu i Bashkisë së Kamzës kërcënonte haptazi banorët jodemokratë se do u prishte shtëpitë në rast se nuk heqin flamujt e PS-së dhe të LSI-së.
Videoja bëri bujë në media, ndërsa sot mësohet se edhe Policia e Shtetit ka marrë masa, pasi ka nisur procedim penal për kryebashkiakun e Kamzës, Xhelal Mziu.
Ky i fundit u justifikua më vonë, duke thënë se deklarata e tij ishte keqkuptuar.
Sipas nenit 329, Mziu rrezikon deri në 2 vjet burg.
Neni 329
Kanosja apo dhunimi ndaj pjesëmarrësve në zgjedhje
(Ndryshuar me ligjin nr. 23/2012)
Kanosja që i bëhet zgjedhësit për të votuar në një mënyrë të caktuar apo për të marrë pjesë ose jo në votime, përbën kundërvajtje penale dhe dënohet nga tre muaj gjer në dy vjet.
Kanosja apo përdorimi i dhunës që i bëhet komisionerit, vëzhguesit, numëruesit si dhe çdo zyrtari tjetër të ngarkuar me zgjedhjet për ta penguar në kryerjen e detyrës apo për shkak të veprimtarisë së tij në administrimin zgjedhor dënohet me burgim nga gjashtë muaj gjer në tre vjet.
Kur kjo vepër kryhet në bashkëpunim ose më shumë se një herë dënohet me burgim nga një gjer në pesë vjet.
