Projekti për segmentin e unazës së re, ka sjellë shumë ndryshime në hyrje të kryeqytetit. Prej disa ditësh ka nisur edhe shembja e ‘shqiponjës’ e vendosur në rrugën që do të bashkojë shkollën Teknologjike me shesh rrotullimin Shqiponja. Kështu kryeqytetasit janë zgjuar mëngjesin e sotëm me shqiponjën e hequr. Sipas projektit rrugët dytësore do të ndërlidhen me këtë unazë nëpërmjet mbikalimeve dhe nënkalimeve të cilat nuk do bëjnë më ndërprerjen me rotonda, por do lejojnë një rrjedhje të qetë të trafikut. Kështu është shprehur muaj më parë zëvendësministri i Infrastrukturës dhe Energjisë Artan Shkreli.
Por, edhe pse për shumë Shqiponja në hyrje ishte një nga elementët identifikues, për artistin Robert Aliaj ajo ka qenë një ‘tradhti ndaj atdheut’. Në një intervistë për Tirana Today, ai shpjegon arsyet përse ai simbol duhet të hiqej sa më parë. (Min 1:40)
“Patrioti shqiptar është nacionalisti. Patriotë shqiptarë janë ata që kanë shqiponjën e deformuar në kuptimin moral. Jo atë shqiponjë që bëra unë, sepse ajo që bëra unë është realiteti.
Patriotizmi i shtirur është ajo shqiponja e salduar me metal që pengon gjithë botën të qarkullojë e të hyjë në Tiranë. Ajo është tradhti ndaj atdheut, që në një autostradë të vendosësh një shqiponjë se e duan UFO-t.
Ajo ka për qëllim vetëm të shkatërroj imazhin e ikonës që kemi neve për simbolin kombëtar. Sepse duke e pasur atë aq të shëmtuar çdo mëngjes, ti fillon e urren. Shqiptarët janë patriotë injorantë. Një patriot është ai që punon mirë dhe zbaton ligjin. Ndërkohë, tek ne patriotë janë këta që po e ndotin Shqipërinë.” TIRANA TODAY
