Vrasësi i ish dhëndërit, Mexhit Picari, pritet të përballet nesër me masën e sigurisë, ndërkohë që së bashku me të do të jetë nën akuzë edhe e bija. Picari qëlloi për vdekje ish dhëndërin Kudret Saliaj vetëm pak minuta përpara se të zhvillohej seanca gjyqësore për divorcin përfundimtar mes tij dhe së bijës, Dhurata Saliaj. Kjo e fundit, mësohet se ka informuar babanë për çdo lëvizje të ish burrit të saj, çka solli më pas edhe veprimin fatal.
Burime hetimore bëjnë me dije se, deklarimet e babait dhe të së bijës kanë qene kontradiktore. Por sekuestrimi i telefonave pritet të zbardhë edhe komunikimet e tyre të fundit, ku do të zbardhet edhe dyshimi e ngjarja ishte e projektuar që më parë, dhe jo nga ndonjë zemërim i çastit, edhe pse ish polici Picari në dëshminë e tij në polici, ai pretendon se ka qëlluar pasi ka viktima e ka sharë. Ajo që mësohet nga burimet e deritanishme, është se babë e bijë kanë qenë nën vëzhgim të lëvizjeve të Saliajt, deri sa kanë vendosur për aktin esktrem.
Ngjarja
Ngjarja e rëndë ndodhi mesditën e së premtes në një lokal pranë Gjykatës së Tiranës. Sipas dëshmitarëve por edhe pamjeve filmike të sekuestruara, është zbardhur dinamika e ngjarjes, ku Mexhit Picari qëlloi për vdekje dhëndërin e tij, Kudret Saliaj dhe plagosi avokatin e tij, Adriatik Camaj. Avokati është jashtë rrezikut për jetën, ndërkohë që të shokuar kanë qenë dëshmitarët e pranishëm në ngjarje.
Dhurata Saliaj, vajza e Mexhit Picarit u arrestua disa orë pas vrasjes, me akuzën e bashkëpunimit në vrasjen e bashkëshortit të saj, me të cilin ishte në proces divorci. Ndërkaq, gruaja e Picarit ka dëshmuar se, ish dhëndëri i kishte kërcënuar disa herë. Madje, mediat bënë publike edhe një intervistë të Mexhit Picarit, ku fliste për përplasjet e ashpra me ish dhëndrrin e tij. “Isha ulur vetëm në tavolinë. Kudreti erdhi dhe shau. E dija sesa i dhunshëm ishte. Mora armën, e kisha pa karikator. E kam mbushur, kam vendosur karikatorin dhe më pas kam qëlluar në drejtim të dhëndërit”, mësohet të ketë dëshmuar Picari përpara hetuesve të ngjarjes.
