“Edhe pse viktima Fabian Gaxha e kishte nxjerrë armën dhe po e drejtonte nga Ervin Mata dhe dy shokët e tij, komandua Meviol Billo është treguar më i shpejtë. Duke realizuar një skenë reale western, në të qindtat e sekondës ai arrin të nxjerrë pistoletën dhe të qëllojë në shenjë disa herë duke e lënë të vdekur Gaxhën”.
Kjo është një pjesë e konkluzionit të hetimit të ngjarjes së të enjtes në mbrëmje në ish-Bllok. Sipas hetimit, qëllimi i Ervin Matës, Fabio Alushit dhe komandos Meviol Bilo ka qenë minimalisht të rrihnin Fabian Gaxhën, me të cilin kishin pasur një konflikt të dhunshëm një javë më parë. Megjithë disa përpjekje, dy palët nuk i kishin sheshuar mosmarrëveshjet gjatë javës.
Ndërkohë hetimi përjashton mundësinë që objekt i atentatit të ketë qenë Ervis Martinaj.
“Ervisi kishte ardhur më herët në lokal, po pinte verë dhe askush nuk ishte i interesuar ti bënte keq apo të provokonte ndonjë konflikt më të. Konflikti nisi kur në lokal u shfaq viktima Fabian Gaxha”, thotë një burim nga hetimi.
Po sipas hetimit, sa e kanë parë Gaxhën, Ervin Mata dhe dy miqtë e tij i kanë dalë përpara duke provokuar një konflikt të dhunshëm. I zënë ngushtë, Fabian Gaxha tenton të zgjidhë situatën duke nxjerrë pistoletën, një “Glock” austriak potent, por nuk mundet të bëjë asgjë pasi komandua Meviol Bilo, edhe pse më pas në kohë, arrin të nxjerrë pistoletën e tij dhe të godasë disa herë trupin e Gaxhës dhe më pas arrin të plagosë edhe Erjon Haten e Ervis Martinajn, të cilët i kishin dalë në mbrojtje shokut të tyre, duke u përfshirë në konflikt.
Policia ka gjetur përtokë në vendngjarje vetëm armën “Glock” të viktimës Fabian Gaxha si dhe gëzhoja të qitura nga tre pistoleta të ndryshme. TIRANA TODAY
