Shefi i Hetimit në Drejtorinë e Kufirit në Korçë, Edmond Çela është pezulluar nga detyra, por pas tij gjithashtu janë pezulluar dhe 5 policë të komisariatit të kufirit në Korçë. Pezullimi i tyre nga SHÇBA vjen një ditë pasi autoritetet greke, zbuluan 2 kilogramë heroinë të fshehur në një autobus në pronësi të Çelës.
Mjeti ishte nisur nga Korça dhe kishte si destinacion Selanikun. Lënda narkotike u bllokua sapo autobusi kaloi kufirin shqiptar. 2 kilogramët e heroinës ishin fshehur në tualetin e autobusit.
Vjehrra e Edmond Çelës ka qenë aksionere në kompaninë+ Metro Euro, kompani në pronësi të së cilës është autobusi me targë AA 390 NY ku u gjetën dhe pakot me drogë.
Kjo sasi droge do të trafikohej drejt Greqisë ndërsa një kontroll me i detajuar nga pala greke ka nxjerr në pah dhe drogën e fshehur në bordin e autobusit.
Çështja e heroinës së sekuestruar në Kapshticë i ka kaluar Krimeve të Rënda. Policia lokale po vijon hetimet për mundësinë e implikimit të personave të tjerë në trafikun ndërkombëtar të lëndëve narkotike me Greqinë. Pjesë e hetimit do të jetë edhe Çela.
